Lindberg 眼鏡初體驗

話說魔術師戴開卡地亞眼鏡，唔同款式都戴過下，而家呢個鏡框都戴咗好幾年，牛骨豹仔 logo 已經頗為殘舊，都係時候轉下品牌，當送份生日禮物俾自己。

做過一輪 research 之後，覺得不如由 grand 變簡樸，試下丹麥品牌 Lindberg 的最簡約款式，睇下魔術師帶咗似唔似斯諾登？

（圖片來源：Lindberg > Showroom > Men > air titanium）

返去相熟的眼鏡鋪，原來就在魔術師裸辭期間搬咗，新鋪開張有８５折，店員猛咁 sell 18K金牛角版，不過魔術師第一次戴呢個品牌，唔使去到咁豪住：

（圖片來源：Lindberg > Showroom > Precious > Men）

魔術師問店員取來 air titanium 來試戴，真係輕如無物，而且實物看上去有點單薄，唔似好穩陣，魔術師唔係咁接受得到。最後，魔術師選取了類似下圖的基本款式鏡框：

（圖片來源：Lindberg > Showroom > Lookbook > model 2294）

驗過眼後，發現原來魔術師人到中年，近視在數年間竟然仲會深咗７０幾度，加埋開始有輕度老花（！），一係就會配兩副（店員梗係想喇！），一係戴漸進鏡，一係就在遠近度數中間取個中間數。魔術師當然係選擇第三個選項。
鏡片選 Nikon 1.74 非球面鏡，配 Transition 同 UV 防紫外光，總共承惠萬多個我城大洋：

由於鏡片是 made in Japan，訂製需時，搞下搞下都等咗成兩個星期先起到貨：

Lindberg 最耍家的就係無螺絲設計，免除甩螺絲的煩惱，真係少隻香爐少隻鬼：

另外，個眼鏡盒可以撳平「接埋」，帶出街一樣咁方便：

至於魔術師點解唔做 Lasik？原因好簡單，就係魔術師一向都唔接受呢類非必要（唔做唔會死）、而且係無法逆轉的「手術」（無論係幾輕微都好）；而且對魔術師來說，眼鏡如同西裝一樣，都係「衣裝」的一種，消費起來特別開心...
（唔好同魔術師講，可以學班柒青咁戴個無鏡片的鏡框呀吓！魔術師死都唔做柒中架！）
＊＊＊
伸延閱讀：
尊貴視力