2018年1月12日 星期五

家有墥頭櫃

首置單身狗,買唔起西營盤800萬的300呎劏房則,改入手樓齡37年的同樣大細的一房,樓價打個6折,主持話樓價480萬,做埋按保,但就只係做7成半按揭上會(37:00—46:44)
樓盤傳真 2017/12/23 2017/12/23 23:11

北角海璇開標後,區內二手放盤普遍反價 3% 至 8% ,個別更瘋狂反價 20% 、涉及過百萬,今集會跟進買家追價程度。
用市區價錢,可以升格住西頁洋房御花園,看來十分吸引。但即使業主索價不算進取,問題是買家需有足夠首期。
何文田皓畋,發展商嘉里 11 月初,推出長達 15 年的一按只供息計劃,成交按月飆升 4 倍,買家當中有34%揀選此方案,但小心樓價已拋離租金。
300 呎一個人住,將間隔拆去改成開放式,擴大空間。但擺完傢俬,空間便會收窄,有什麼解決方法?
單身狗戶主少煮食,可以將房間和廚房拆去改開放式,擴闊儲物、浴室及生活空間,仲要留返個海景:

設計師將廳房之間的牆壁拆去,改為開放式,以半身櫃隔開廳床;原來的廁所變身衣櫃,窗封掉;又將廁所移到原來的廚房位,窗封掉用來放熱水爐,廚房搬出廳(左上、右上)。廳嘅窗框換過哂,可享無敵海景(左下'右下):

入門口玄關有個鞋櫃,尚算正常(左上)。廳有梳化、茶几、電視櫃,雖然茶几有捲廁紙比較 odd,亦算正常,係啲天花射燈怕唔夠光啫(右上)。廁所佈置亦算平實,不過窗戶被熱水爐封住,變成自製黑廁;花洒旁的凹位易藏水,用來放沐浴用品未免唔係太實用(左下、右下):

廚房牆壁用黑玻璃面,懶係型咁反光,可以「引入窗外風景」;有橫鐵通用來掛一梳蕉,隔離係吊高了的微波爐,拎嘢時小心唔好倒瀉;爐頭上有抽油煙機,但睇返圖則,嗰個位附近根本無窗,唔通係可以將油煙抽返入屋嗰隻過濾式抽油煙機(左上)?雪櫃隔離整個櫃,可以用來放雜物(右上)。睡眠區位於升高地台之上,可以儲物,同時配以滲燈效果(左中)。衣櫃在原先的廁所位,把窗封掉;櫃門以木條子隱藏門設計,似足紙皮箱(右中)。打開衣櫃門,間隔頗為神奇,衫掛唔到幾件,反而一格格俾戶主放摺得嘅衫褲就多,單身狗連摺衫都廢事亦可以就咁亂咁放(左下、右下):

在電視櫃背面造一個凸出的凹槽,當成係床頭櫃,不過戶主起床恐怕易撼親個頭(左上、右上);床褥底係電動升降地台,用來放唔去旅行會死的旅行喼(左下、右下):

40萬雖然唔可以話貴,但係得300呎,做埋啲效果其實好一般。最弊就係「床頭櫃」隨時變「墥頭櫃」;而且「床頭櫃」背面係電視櫃,咁多電流電磁波係戶主個頭度,唔使識風水都知易惹病喇!

12 則留言:

  1. 睇條片嗰單位好好風,夏天可能幾涼爽,個海景又真喺唔錯(不過我唔熟香港嗰邊唔知有冇架空公路之類)

    //單身狗戶主少煮食,可以將房間和廚房拆去改開放式

    食飯枱都冇櫈都冇一張,咁人客上嚟一就喺沙發二就喺牀褥,速戰速決喇喂。

    //雖然茶几有捲廁紙比較 odd,亦算正常

    笑死我!XD

    //在電視櫃背面造一個凸出的凹槽,當成係床頭櫃

    連個枕頭都跌咗喺嗰罅位..幾乎喺瞓地下就咁一個床褥,每朝起身會唔會辛苦咗啲。其實可唔可以保留一小部分嘅牆咁樣睡覺就唔會完全冇靠山。

    回覆刪除
    回覆
    1. //睇條片嗰單位好好風,夏天可能幾涼爽,

      你竟然真係有睇片, 真係估你唔到.

      係, 有幾個shoot 係落咗窗簾拍攝, 睇到窗簾被吹到浮起.

      //個海景又真喺唔錯(不過我唔熟香港嗰邊唔知有冇架空公路之類)

      西營盤, 臨海無架空公路的.

      //連個枕頭都跌咗喺嗰罅位..

      如果要升起床褥拎地台裡面嘅嘢, 咁張床褥就要移出一條罅,否則會頂到個「凸出的凹槽」(床頭櫃).

      //幾乎喺瞓地下就咁一個床褥,每朝起身會唔會辛苦咗啲。

      「和風塌塌米」

      //可唔可以保留一小部分嘅牆咁樣睡覺就唔會完全冇靠山。

      咁設計師就連40萬都搵唔到喇!

      刪除
  2. 又大改廚厠位, 先有冇諗過轉唔轉到手--唔入則上唔到會
    定係用大家都做緊嘅"唔同銀行講", 但而家泛民話呢招係刑事, 要報警

    回覆刪除
    回覆
    1. 照理但凡大改動都要先揾合資格人士入圖則申請,批了合格才可動工。試問有邊個香民真係會咁做?

      刪除
    2. 唔識嘅建築 floor plan 唔適合而家嘅生活模式,好多時都要改改。而家多咗自己一個出嚟住嘅人,而且單身時間長好多,頂多多個女友/男友/貓/狗。

      刪除
    3. 語音輸入錯字睇漏眼
      唔識 should be 舊式

      刪除
    4. //又大改廚厠位, 先有冇諗過轉唔轉到手

      將來買家要「依現狀買入」就得.

      //唔入則上唔到會

      小型工程可以唔使入則.

      //凡大改動都要先揾合資格人士入圖則申請,批了合格才可動工。

      對.

      //而家泛民話呢招係刑事, 要報警
      //有邊個香民真係會咁做?

      即係話要拉哂班唔依交通燈過馬路嘅刁民.

      //而家多咗自己一個出嚟住嘅人,而且單身時間長好多,頂多多個女友/男友/貓/狗。

      我都係單身狗 XD

      刪除

    5. 不敗的魔術師2018年1月12日 下午10:10
      //又大改廚厠位, 先有冇諗過轉唔轉到手

      將來買家要「依現狀買入」就得.

      //唔入則上唔到會

      小型工程可以唔使入則.

      //凡大改動都要先揾合資格人士入圖則申請,批了合格才可動工。

      對.

      //而家泛民話呢招係刑事, 要報警
      //有邊個香民真係會咁做?

      即係話要拉哂班唔依交通燈過馬路嘅刁民.

      //而家多咗自己一個出嚟住嘅人,而且單身時間長好多,頂多多個女友/男友/貓/狗。

      寵物唔算, 但係有男女朋友就唔係單身狗喇!

      刪除
    6. //寵物唔算//
      梗係算啦!幾多人裝修做個門仔响門畀寵物。又橋又剩畀貓仔,樓梯級同小小假草地廁所畀狗仔。應冇盡有!

      刪除
    7. 係喎,我都唔記得「寵物係家庭成員」添!

      刪除
  3. 可能因為細size,冇咩好搞,反而更加正正常常,起碼冇開放式廁所或者"和風"自動麻雀枱。

    睇圖則,個床頭應該係窗邊,唔洗貼住個電視。

    回覆刪除
    回覆
    1. //反而更加正正常常

      今次算係有50%係正常嘅。

      //睇圖則,個床頭應該係窗邊,唔洗貼住個電視。

      雖然幅國係咁畫,但個凹槽有燈掣,仲用來擺遙控,親者又話「用作床頭櫃,唔使戶主要走來走去關燈」,所以我個理解係床頭多啲。

      刪除