魔術師資產配置（２０１８年１月結）

２０１８年１月份全球股市均大幅上揚，且看所謂「一月效應」是否能堅持到年尾。
魔術師各投資組合排名變化不大，頭兩名依次是沉船基金，收報每單位（下同）＄１７４.２６；次名係複式盈富，收報＄１６６.９１。
生活基金又再超前房託組合，佔第三位，收報＄１３１.２６；房託組合名列第四，收報＄１３０.１１。
強積金組合由於持有唔少債券基金，升幅不大，佔第五位，收報＄１１８.８２；合格線債券及現金組合保持排第六，由於定息證券價格回落，輕微下跌，收報１１３.４３。
無現金流唔識派息的商品組合繼續反彈，收報＄１０８.７３，未有耐追得上第六位。

依此走勢，睇嚟早前訂立的「２０２０年１０月前，淨流動資產達至８００萬我城貨幣」（見《魔術師資產配置（２０１７年９月結）》）暫時係樂觀的，甚至可以提早達標；問題是達標之後如何持盈保泰，將身家 keep 住直至過終點線都唔會因為市況回調而得而復失。究竟係直接增持現金定係用其他方法對沖，魔術師仲係諗緊。

同樣地，如果樓價再升上去，加按套現再投資或者 keep 在 mortgage link 備而不用當然也是一個選項，但問題又係要比較容易地借錢，繼續做工資奴似乎係唯一比較簡單的方法。魔術師又唔係咁想幾年後仲有搵工的壓力，呢一點又係要諗清楚。哎，究竟我城啲錢莊點先可以唔再睇糧單借錢呢？依家咁多新一袋人做 freelancer 或者創業，錢莊的借貸制度仲咁保守，只會繼續扼殺我城新經濟的發展咋喎！

講起「加按套現」，就自不然去睇下成日將呢句說話掛在嘴邊的乜 sir。

（圖片來源：乜 sir：回應債市爆煲之說 #1513）

乜 sir 遮住個 CUSIP/ISIN 但又唔遮 IB symbol 都唔知做乜。Anyway，原來用 Interactive Broker（IB）買債都可以開個新班子，「坐在香港用電腦到美國下單」，竟然就係「比較進階」（唔通「比較 low tech」到美國下單的方法係打電話俾私銀 banker？），實在係非常搞笑。
＊＊＊
伸延閱讀：
魔術師資產配置（２０１７年９月結）