2017年1月11日 星期三

摩摩電影節之《魔警(That Demon Within)》:以武抗暴真自焚

提起「魔警」兩個字,大部份人都會想起步步高;但明顯本片只是「借用」了有關「綽號」,實際上跟步步高半點關係也沒有,更不是甚麼真人真事改編:


悍匪鬼王黨七人眾打劫珠寶商,與黑警駁火,但途中有人竟然發現有鑽石,疑似係黑吃黑,鬼王黨首領韓江(張家輝飾)於是便將發現真相的同伴(柳州泉)幹掉。韓江在逃期間,被黑警圍補,但有人通風報信,韓江趁機逃去。在追逐期間,韓江  撞車受了重傷,醫院血庫無血,幸好在西九醫院急症室遇上了當值魔警王偉業(吳彥祖飾),偉業不用搞公眾諮詢便捐血救了韓江,卻給趕來的西九重案組頭頭莫子勳(林嘉華飾)大罵了一頓:

偉業十八歲當差,做了十七年,仍然是個PC仔,原因就係好似魔術師初出茅廬時一樣,對對錯異常執着,係個完美主義者,非常 unapproachable,被評為「性格有問題」。做黑警同其他職業一樣,都係要講埋堆,偉業唔得人和的結果就係在各個環頭掉來掉去,無得升職:

識人果然好過識字,舊同學兼女上司高級督察 Liz (思漩飾)將偉業調出來。偉業巡更擔X唔偷食,係都要趕車行泊在路邊的車輛,又揭發同事 hea 做開小差,仲無端端走去巡天井,發現道友屍體,搞到自己同拍檔一身異味:

韓江逃離覊留病房,跟一接頭人會面,接單打劫。原來接頭人係個收租仔,揹住幾層樓仲供緊未有耐財務自由,於是便藉着販賣情報造案以達至財務自由。韓江將消息帶回殯儀館巢穴,跟黨羽文哥(廖啟智飾)、堂倌(歐錦棠飾)、紙紮恩(李國麟飾)、花仔祥(梁焯滿飾)、和喃嘸佬(藍靖飾)商議,原來上次單案文哥分紅甚少,連買樓首期都唔夠俾,睇嚟傷港地打劫都係為買樓。鬼王黨又出動犯案,再跟黑警駁火,偉業與同袍來增援;但韓江將汽車射爆令偉業眼白白看着拍檔變成被焚者燒死。最後韓江更饒偉業一命,揚長而去:

韓江想獨吞鑽石,鬼王黨內訌,喃嘸佬被殺,韓江也掉到山崖下:

這晚夜偉業想着拍檔死狀,久不能眠。偉業收到電話,自己一向照顧開的婆婆在家門前滑倒受傷,進了醫院,家務助理話係因為門口有豬油,看來是畜牲地產的收樓行徑。偉業去到婆婆家裡,剛巧見到兩條柒頭青年在潑豬油,便將二人狠狠湊了一頓,打到不似人形。奇怪的是,偉業回到家裡會用皮帶鞭打自己:

這天一眾街坊疑似係因為港扒被阿伯非禮,爭吵起來,偉業負責調解,卻被刁民老屈「差佬打人,仲想拔槍」,導致情緒失控。偉業在警車休息期間,喃喃自語話要「殺哂佢地」,又話聽到有槍聲,周圍走來走去:

Liz 擔心偉業患上思覺失調,便請來心理醫生家姐 Stephy(陳芷菁飾)來幫偉業做催眠治療。原來偉業父親生前一向教仔甚嚴,完全唔準阿仔犯錯,否則藤條炆豬肉,所以偉業自小便律己甚嚴(魔術師都係自小律己甚嚴,但好在老父唔係暴力狂),而「體現做到最好」,竟然就係走去龍獅旗下做黑警 (乜唔係話好仔唔當差咩?):

Liz 去探望婆婆,跟家務助理談起偉業跟婆婆的關係。原來偉業跟婆婆並無血緣關係,但偉業自懂事起便多加照顧,直如兩婆孫一樣;而婆婆也曾有一子,二十多年前死了,也是一名黑警,樣子跟韓江頗為相似:

重案組辦事不力,幾經辛苦先找到紙紮恩入手;但偉業卻求其問個紙紮鋪阿伯,由鬼王面具便可以找到紙紮恩的下落,更溢取其鑽石以作挑撥離間之用:

花仔祥看上了路上的盲女,捉了去跟堂倌帶到山邊輪女女女。偉業跟蹤而至,見到堂倌,花仔祥仍在享受。二人打了起來,花仔祥中了捕獸器動彈不得,偉業想殺但下不了手。這時韓江出現,擊殺花仔祥,並教偉業要撃敗鬼王黨便要令他們內訌:

偉業依韓江之言,利用鑽石栽贓令鬼王黨自相殘殺。文哥殺掉堂倌和紙紮思,並致電重案組頭頭莫子勳的得力助手陳志斌(安志杰飾),調查誰在興風作浪。此時事情已很明顯,斌就是警方內鬼,通風報信給鬼王黨做案接贓的就是斌。同時,韓江的屍體亦已被發現,原來早就在山崖跌死;偉業看到的韓江,只是自己的心魔:

醫院傳來噩耗,婆婆病死了,臨終時仍是對找不到殺子兇手念念不忘。偉業將婆婆屍身盜回家中,在幻覺裡揭曉了自己就是那兇手,二十多年來對婆婆多加照顧是為了補償自己的過失(這可能也是偉業十八歲就去當差的原因):

偉業手舞足蹈,幻想自己被火燒,給前來探望的 Liz 見到,十分擔憂。斌查到是偉業得到了紙紮恩的鑽石,文得到通知上來尋仇,誰知三兩下便卻給偉業打倒了:

子勳和斌等亦到來,斌現出本來面目,殺死文、Liz、和子勳:

最後的追逐戰,斌駕車失控墥入油站被困起火,而偉業卻只顧對住塊鏡開槍,想殺掉「鏡中」、即心裡的韓江。偉業想起婆婆兒子被燒死的慘狀,拼了命去救斌,卻連自己也變了「自焚者」:

迷底揭曉,在二十五年前,因為逼遷事故,偉業父親帶埋阿仔一起以武抗暴(感受一下個氣氛?),被婆婆的黑警兒子打傷。偉業父親唔掟磚改掟火水爐,婆婆兒子用盾牌擋格,火水爐反彈,燒死了偉業父親。成為了孤兒的偉業成為了初代登高仔,不知如何可以起到婆婆兒子底,到他們家縱火。偉業將二人家裡鐵閘鑽起,婆婆兩母子逃生不得,黑警兒子以濕綿皮蓋住母親,自己卻被燒死了。黑警臨死前的慘叫聲,令在父親嚴厲管教下成長的偉業「頓悟」,但由於「始終是殺了人」,便從此種下了偉業的心魔:

影片最後以「人心總納一點黑」作結:

***
本片其實唔算懸疑,bug也不少:警方有內鬼其實很明顯;而且韓江四出犯案,又不可能是偉業的人格分裂,《搏擊會(Fight Club)》條橋又用唔上,所以偉業行兇時是以「韓江」的形象出現,也不難理理解;而偉業其實是殺婆婆的兇手,片中不斷穿插的 flashback 也講得很明白,只係終極理由「偉業父親在抗爭中被殺」需要在最後劇情開估。偉業為何可以咁神通廣大,跟蹤玩弄鬼王黨如入無人之境;而鬼王黨只是在殯儀館裡混飯吃的人,為何可以殺人不眨眼,面對黑警毫無懼色,認真木宰羊。
另外本片有多段對白講買樓,逼遷,強制收樓等,似乎地產霸權就是整件事情的始作俑者。
本片唯一有睇頭的,就係睇梳了個柒頭宅男髮型的吳彥祖擔大旗獨自表演,猶其是扮思覺失調,開始嘗試去學積尼高遜(Jack Nicholson)在《閃靈(The Shining)》的演出,算是驚喜。至於張家輝的韓江只能算是客串角色,戲份不多,放佢入去做做「男主角」只能算是宣傳技倆吧。
又,無端端做乜要加個蝗妹演員來做 Liz?呢類寫黑警的題材應該進不了蝗國...
又又,本片的火燒人場面造得比《十年之自焚者》好得太多,不在話下。
又又又,李國麟飾演的紙紮恩,驚驚青青的樣子頗為搶鏡。而戲中紙紮恩本名陳海恩...驟眼睇仲以為係容靚靚!
***
伸延閱讀:
《十年(Ten Years)》之《自焚者(Self-Immolator)》:前人自焚後人花生

14 則留言:

  1. 魔術師兄睇港產片真好心機~我依家每逢見到張家輝/吳彦袓/劉青雲/古天樂的戲,就有哋“審美疲勞”。家中NOW台有佢地既戲我都會望下,但刻意去電影院就免啦。

    回覆刪除
    回覆
    1. 摩摩推介吖嘛,我本來都好少睇港產片的。

      刪除
    2. 因為自從廿年前裝咗有線後,睇咗好多港慘片,覺得唔系好多中慘傷民講到咁差;而魔兄在小弟推介前已出過港慘片的影評,所以乘機推介下,略作正名而已。

      當然睇咗咁多年,垃圾既都極多,即使我認為客觀上是佳作再加純粹合符小弟自己小眾口味的,數目都遠比差評的少...但話說回來,美帝境內都有好多出唔到口的C級片吧。

      所以其實好嘢唔多唔少就是要在一大堆廢品中試錯才能產出...即使如阿三的寶萊塢,大部份作品在外國人眼中都系得啖笑,但都出到套《Three Idiots》.

      亦側面反映了港慘片的路越走越窄...產出越來越少,圈內人又鬥氣想講理念多過講故事...唔再推介下,可能真系如黐線輝話齋,無埋港慘片就真系無嘢好推介了.

      刪除
  2. 魔術師,你攪太夜啦!
    墥車 -- 撞
    貪 X 唔偷食 -- 擔

    打劫珠寶行有鑽石有乜咁出奇?唔明。

    回覆刪除
    回覆
    1. //魔術師,你攪太夜啦

      嗯, 呢排真係夜咗啲.
      改ed...

      //打劫珠寶行有鑽石有乜咁出奇?

      因為班賊個plan本來係唔包鑽石, 只搶錢.

      刪除
  3. 哈哈,咁快又多一套,魔兄真俾面!

    //明顯本片只是「借用」了有關「綽號」,實際上跟步步高半點關係也沒有,更不是甚麼真人真事改編:

    某程度上是抄考了步步高的“過份律己”性格,進而“希望越大、失望越大”的過程。

    //卻給趕來的西九重案組頭頭莫子勳(林嘉華飾)大罵了一頓:

    這其實是莫sir不專業之舉,先不說魔警並不知被救者為何人,就算知道,警察責任是“保障市民生命財產安全”,對涉嫌犯罪市民也只有拘捕之責而沒有奠定生死之權...即使以上只是紙面職責,內裡側側膊是另一件事,但都唔使咁大聲當眾對個下級講出口?

    另外林嘉華真系keep得幾好,而且即使退役咁耐,做高級警官仍然入型入格,到現在傷港演員仍然不作他人想;不過話說回頭,佢最高級都只能扮前線人員,類似《寒戰》班已上神檯的管理級別,佢又唔系好似...

    (順便提你,《寒戰2》已經出左DVD,可以正式入list...)

    //花仔祥(梁焯滿飾)

    原來佢系前港姐梁佩瑚個細佬,不過近排惹上官非...

    //偉業依韓江之言,利用鑽石栽贓令鬼王黨自相殘殺。文哥殺掉堂倌和紙紮思

    殯儀館內訌呢段我覺得拍得好好睇!

    //醫院傳來噩耗,婆婆病死了

    呢段吳彥祖在醫院徘徊個樣好入戲,真系令人好不安...

    //斌現出本來面目,殺死文、Liz、和子勳:

    戲中無正式交待Liz有無死...

    //韓江四出犯案,又不可能是偉業的人格分裂,《搏擊會(Fight Club)》條橋又用唔上,所以偉業行兇時是以「韓江」的形象出現,也不難理理解

    所以要用“韓江與殺父黑警樣貌酷似”來作引子,可以勉強解釋為魔警見到韓江後,將其形象與殺父黑警混淆,然後引出“其心中的一點黑”.

    //而鬼王黨只是在殯儀館裡混飯吃的人,為何可以殺人不眨眼,面對黑警毫無懼色,認真木宰羊

    不過我又覺得營造氣氛上,的確將呢批殯葬業人士塑造得頗為陰森。

    //本片其實唔算懸疑

    以一眾林超賢作品論(例如《激戰》),《魔警》劇本的確不算出彩。

    //本片唯一有睇頭的,就係睇梳了個柒頭宅男髮型的吳彥祖擔大旗獨自表演,猶其是扮思覺失調,開始嘗試去學積尼高遜(Jack Nicholson)在《閃靈(The Shining)》的演出,算是驚喜

    如果問一眾港女,唯一公認靚仔的華人藝人肯定是吳彥祖(古天樂頂多排第二);但自其出道以來,扮靚仔的角色其實很少,反而嘗試不同類型角色,可知其不想“恃靚行凶”的勤奮程度。

    //至於張家輝的韓江只能算是客串角色,戲份不多

    不過佢幾個做“魔警心中黑警”時的幾個奸笑,又真系好搶!

    //又,無端端做乜要加個蝗妹演員來做 Liz?呢類寫黑警的題材應該進不了蝗國...

    哈哈,你錯了:

    https://zh.wikipedia.org/wiki/%E9%AD%94%E8%AD%A6

    “中國大陸首周三天收穫5090萬人民幣列第四位。次周收4900萬蟬聯第四。第三周收940萬列第九位,累計1.089億。”

    上畫時CEPA優惠仍然未放寬到所有港慘片,所以加個蝗妹應該是為符合“狹義合拍片”的要求。

    蝗國要求主要是“惡人一定要有惡報”,黑警(尤其非蝗國境內)並非一定犯禁,否則兩套《寒戰》都上唔到畫了。

    //我依家每逢見到張家輝/吳彦袓/劉青雲/古天樂的戲,就有哋“審美疲勞”

    無計,21世紀後,傷港演藝圈出過乜嘢人呢?

    本來我都諗緊加唔加呢套入list,但經春花姐呢句,都系加啦,因為好似近年可以入list的港慘片都明顯減少了--《樹大招風》。尤其賣點是:蝗資有份投資但結果入唔到蝗國、其中一個導演是《方言》導演(不過兩者應該無關係)。另外對於一眾70後而言,戲中對傷港(甚至蝗國)90's的演繹,也能引起不錯的集體回憶。

    回覆刪除
    回覆


    1. //某程度上是抄考了步步高的“過份律己”性格,進而“希望越大、失望越大”的過程。

      仲有因「性格問題」,唔得人和的問題.

      //這其實是莫sir不專業之舉

      片中後來有講(或暗示)莫sir兒子也是警察, 死也韓江手中, 故此莫sir「臨退休仲咁搏」而唔係hea做. 不過我又覺得如果同疑犯有私人恩怨, 黑警內部應有規定同事唔能夠負責返相關case.

      //林嘉華真系keep得幾好,而且即使退役咁耐,做高級警官仍然入型入格,到現在傷港演員仍然不作他人想;不過話說回頭,佢最高級都只能扮前線人員

      以前陳欣健負責做警司級的高級警官.

      //原來佢系前港姐梁佩瑚個細佬,不過近排惹上官非...

      呢條友我對佢嘅印象就只有三級片.

      //戲中無正式交待Liz有無死...

      咁又係...

      //營造氣氛上,的確將呢批殯葬業人士塑造得頗為陰森。

      仲要指明係九龍殯儀館, 唔怕被人告?

      //蝗國要求主要是“惡人一定要有惡報”,黑警(尤其非蝗國境內)並非一定犯禁

      原來如此. 我成日以為係對公安同人民子弟兵是「一句壞話也不能講」的。

      //《樹大招風》

      加咗list 了.

      //其中一個導演是《方言》導演(不過兩者應該無關係)

      咁你都留意到? 服!

      歐文傑
      歐文傑(1981年-),香港電影編劇、導演,2004年於香港演藝學院導演系畢業。[1]作品包括《虹》、《計程車》、《聖誕禮物》、《我的女兒》、《十年·方言》、《樹大招風》、《太平地》。

      刪除
    2. 又話張家輝係吳彥祖個陰暗面嘅?咁吳究竟捐血俾邊個?莫 sir 又鬧緊邊個?

      刪除
    3. //黑警內部應有規定同事唔能夠負責返相關case.

      我相信黑警內部會有這個規定,這亦是好多港慘警匪片的bug,遠至《英雄本色》已經有了;刻意留白莫sir子之死是否同韓江有關,已經算系咁了。

      //我成日以為係對公安同人民子弟兵是「一句壞話也不能講」的

      我對蝗國電視劇認識只是皮毛,但因為記得陳道明做過套咁嘢,所以幾肯定“幹部被收買”不一定犯禁:

      http://baike.baidu.com/subview/863/5948040.htm

      “副市长聂大海之子聂明宇...暗地里,他却操纵着天都市最大的地下黑社会活动。他设立赌场,有计划有预谋地拉拢腐蚀天都市的干部队伍,并利用父亲的市长背景,大肆收买海关各级人员,走私贩私,牟取暴利”

      當然最後結果是

      “最终,这起罕见的走私大案以正义战胜邪恶而结束。”

      而“邪不勝正”的底線,最出名的當然是《無間道》的兩個結局:

      https://zh.wikipedia.org/wiki/%E7%84%A1%E9%96%93%E9%81%93

      “影片在中國大陸及馬來西亞上映時,礙於相關單位嚴格的審查規定,故特別製作出另一結局的版本。”

      https://www.youtube.com/watch?v=w6N7nnzPpek

      其實大馬的電撿審查一直嚴格,除“邪不勝正”外,對女性性感鏡頭比蝗國嚴得多(我在當地睇電視播港慘片,系連波罅都要打格仔的),傷民行內人都知道...只不過近十幾廿年大馬市場is nothing to Hongkies,所以才相安無事而已。

      //又話張家輝係吳彥祖個陰暗面嘅?咁吳究竟捐血俾邊個?莫 sir 又鬧緊邊個?

      張家輝系做三個角色:鬼王黨頭目韓江、婆婆已死的黑警兒子、以及王偉業的心魔(或投射)。

      王偉業決定捐血時是未見過韓江的,只是在捐血途中見到酷似自己兒時親手燒死的黑警,開始勾起自己的投射...之後王在行事時其投射就會以韓江/黑警形象出現。

      莫sir鬧的當然是為何捐血俾韓江。

      刪除
    4. //咁吳究竟捐血俾邊個?

      吳(王偉業)捐血俾張家輝(韓江).

      韓江真有其人. 偉業將其化成自己的心魔, 當做違心的事時就是韓江做的, 自己就要求自己完美.

      //莫 sir 又鬧緊邊個?

      個截圖有正反鏡頭, 莫 sir 鬧緊 王偉業.

      刪除
    5. 呢個我講得唔好。我一心諗張家輝都係吳彥祖,所以捐血事件可能係假嘅,變成林家華都唔知做乜鬧人。
      個故仔無高潮,可能睇影片先有 feel。人物各有目的但之間嘅關係好淺,唔令人感到緊張。故仔又多 bugs。所以成件事好唔吸引到我。

      刪除


    6. //而“邪不勝正”的底線,最出名的當然是《無間道》的兩個結局

      咁又係,蝗國好似只係需要邪不能勝正, 要帶出正面訊息.

      //其出道以來,扮靚仔的角色其實很少,反而嘗試不同類型角色,可知其不想“恃靚行凶”的勤奮程度。

      同埋佢平時都無乜「耍帥」新聞(例如唔會賣內褲廣告)...

      //原來佢系前港姐梁佩瑚個細佬,不過近排惹上官非...

      信報 2017年1月12日
      凌通 中環解密
      藝人梁焯滿脫洗錢罪 當庭釋放
      曾參演多齣《古惑仔》電影系列的藝人梁焯滿,被控於2013年12月至2014年4月期間,清洗逾100萬元黑錢,案件昨日於東區裁判法院續審;辯方於之前審訊期間,對梁與警方的會面紀錄提出爭議,至昨日裁判官覃有方決定,不接納梁早前作出的招認供辭。
      由於控方並無提供其他直接證據,故裁定梁表面證供不成立,撤銷控罪,梁焯滿獲當庭釋放。
      40歲的梁焯滿,演員出身,最為人熟悉的是九十年代參與電影《古惑仔》系列演出,飾演「肥屍」一角,他又參演過《黑獄斷腸歌2》及多部三級片,主要扮演黑幫分子等配角,近年則曾自導自演電影《功夫之王》,其胞姊梁佩瑚是1989年香港小姐季軍。
      【案件編號:ESCC3054/2015】

      //大馬的電撿審查一直嚴格,除“邪不勝正”外,對女性性感鏡頭比蝗國嚴得多

      但大馬的色情事業卻...

      //唔令人感到緊張。

      偉業用計令鬼王黨自相殘殺都幾好睇, 係我無detail cap 圖啫. 不過 in general 故事高潮位唔夠爆, 好多嘢都估到.

      刪除
  4. 懶係神探咁。我都係鐘意 Identity
    https://www.youtube.com/watch?v=S8fjyxM7DgU

    回覆刪除
    回覆
    1. 正喎,有John Cusack!

      已落list, 謝推介!

      刪除